विराटनगर । रंगेली नगरपालिकाको नगरसभा सम्पन्न भएको छ । विभिन्न निर्णयहरु गर्दै शुक्रबार नवौँ नगरसभा सम्पन्न भएको हो । नगरसभामा सभाध्यक्ष एवम् मेयर दिलिप बगडीयाले राखेको प्रस्ताव सर्वसम्मत पारित भएको छ ।
नगरसभा समक्ष मेयर बगडीयाले आय/व्ययको अनुमोदन, योजना कार्यक्रम संशोधन रकमान्तर अनुमोदन, करार सेवा तथा ज्यालादारी कर्मचारीको म्याद थप, घर नक्सा अभिलेखिकरण म्याद थप, जिल्ला समन्वय समितिबाट प्राप्त हुने रकम विनियोजन गरिएको अनुमोदनसम्वन्धी प्रस्ताव राखेका थिए ।
त्यसैगरी सभाध्यक्ष बगडीयाले योजनाका लागि अपुग हुनसक्ने रकमलाई व्यवस्थापन गरिएको सोको अनुमोदन, नगर कार्यपालिकाले चालु आर्थिक वर्षमा हालसम्म गरेका निर्णयहरु अनुमोदन, योजनाको म्याद थप, पशु विमाका लागि लाग्ने सिफारिस दस्तुर मिनाह र नगर शिक्षाबाट भए गरेका काम कारवाहीको अनुमोदनका लागि नगरसभा समक्ष प्रस्ताव राखेका थिए ।
मेयर बगडीयाले राखेको सवै प्रस्तावहरु सर्वसम्मत पारित भएको छ । प्रस्तावहरु पारित हुनुअघि उनलेछलफलका लागि नगरसभा सदस्यहरुलाई समय दिएका थिए ।
सो अवसरमा नगरपालिकामा कार्यरत दुई जना कर्मचारीहरुलाई सम्मान समेत गरिएको छ । योजना अधिकृत कृष्ण भट्टराई र प्राविधिक कर्मचारी जयप्रकाश मण्डललाई मेयर बगडीया, उपमेयर भूमा पराजुली, प्रमुख प्रशासकीय अधिकृत तेजिन्द्र गौतमले दोसल्ला ओढाउँदै सम्मानपत्र प्रदान गरि भट्टराई र मण्डललाई सम्मान गरेका हुन् ।
नगरसभामा उपमेयर पराजुलीले स्वागत मन्तव्य राखेकी थिइन् । नगरसभाका सचिव समेत रहेका प्रमुख प्रशासकीय अधिकृत गौतमले नगरसभा सञ्चालन गरेका थिए ।
