विराटनगर । रंगेली नगरपालिकाले पारदर्शी ढंगले परीक्षा सञ्चालन गरी कर्मचारीहरु छनौट गरेको छ । नगरपालिकाले कार्यलय परिसरभित्रै खुल्ला ठाउँमा पारदर्शी रुपले परीक्षा सञ्चालन गरि करारमा कर्मचारीहरु नियुक्त गरेको हो ।
रंगेली नगरपालिकाका मेयर दिलिप बगडीयाले कुनै पनि सोर्सफोर्स र भनसुनबाट नभई आफ्नै योग्यता र क्षमताका आधारमा कर्मचारी छनौटमा जोड दिँदै आएका छन् ।
विभिन्न पालिकामा आसेपासे र कार्यकर्ता भर्तीकेन्द्र जस्तो हुने गरेको देखिएपनि मेयर बगडीया भने निश्पक्ष तथा पारदर्शी ढंगले परीक्षा सञ्चालन गरि योग्य र क्षमतावान कर्मचारीहरु नियुक्ती गराउँदै आएका छन् ।
मेयर बगडीयाले कुनै पनि दवाव, प्रभाव, सोर्सफोर्स, भनसुन ठाडै इन्कार गर्दै र निश्पक्षरुपमा कर्मचारी छनौट हुनुपर्नेमा जोड दिँदै आएका छन् । सोही बमोजिम नगरपालिकाले यसपटक पनि परीक्षा सञ्चालन गरि आवश्यक आवश्यक कर्मचारीहरु नियुक्त गरेको हो ।
रंगेली नगरपालिकाका प्रमुख प्रशासकीय अधिकृत तेजिन्द्र गौतमले जिम्मेवारी सम्हालेको दुई साता यता मात्र ६ जना मेडिकल अधिकृत (चिसकत्स), एक जना दन्त चिकित्सक, १० जना स्टाफ नर्स, एक जना रेडियोग्राफर, एक जना फार्मेशी सहायक र तीन जना माध्यामिक तहको शिक्षण सहयोगी उनकै संयोजकत्वमा छनौट गरी नियुक्त भएका छन् ।
नगरपालिकाले तयार गरेको करारमा कर्मचारी तथा शिक्षक छनौट सम्वन्धी कार्यविधि बमोजिम नियुक्त गरिएको मेयर बगडीयाले जानकारी दिए । ‘रंगेलीमा हाम्रो भन्दा राम्रो मान्छे छनौट गर्छौँ ।’ उनले भने,‘कुनै सोर्सफोर्स, भनसुन यहाँ चल्नेवाला छैन । जो योग्य छ, उ आफै परिक्षाबाट छनौट भएर आउन्छन् । हामी निश्पक्ष गर्छौँ ।’
नगरपालिकामा सञ्चालित परीक्षाहरु नगरपालिकाको प्राङ्गणमानै पारदर्शी रुपमा सञ्चालन गरिएको प्रमुख प्रशासकीय अधिकृत गौतमले जानकारी दिए । योग्यतामा आधारित छनौट प्रकृया अपनाइएको, कुनै पनि नियुक्तिमा कसैको दवाव तथा भनसुन नआएको र स्वतन्त्र रुपमा परीक्षा सञ्चालन गरिएको छनौट समितिका संयोजक समेत रहेका प्रमुख प्रशासकिय अधिकृत गौतमले बताए ।
नगरपालिका भित्रका सामुदायीक विद्यालयका कर्मचारी तथा कार्यालय सहयोगीको समेत परीक्षा नगरपालिकामानै हुने गरेको छ । प्रमुख प्रशासकीय अधिकृत गौतम आएपछि रत्न मावि रञ्जनीमा समेत एक जना कार्यालय छनौट गरि सिफारिस गरिएको छ ।
नगरपालिकामा हुने सम्पूर्ण परीक्षा, परीक्षाका विधि तथा मापदण्ड लोकसेवा, शिक्षक सेवा आयोग तथा नगरपालिकाको मापदण्डलाई आधार मानी गर्ने गरीएको प्रशासन शाखा प्रमुख दिपक प्रकाश तिमिल्सीनाले बताए ।
रंगेली नगरपालिका जस्तै अन्य पालिकाले पनि गर्ने भए पहुँच नभएका सर्वसाधारण जनताका छोराछोरीले निश्पक्ष प्रतिष्पर्धा गरी रोजगारी पाउने थिए । रंगेलीको सिको अन्य पालिकालेसमेत गर्न जरुरी छ ।
