विराटनगर । रंगेली नगरपालिका र नेपाली कांग्रेसबिच भएको वार्ता सकारात्मक भएको छ । शनिबार साँझसम्म विराटनगरमा भएको वार्ता सकारात्मक दिशामा अघि बढेको हो ।
शनिबार विराटनगरमा नेकपा (एमाले) र नेपाली कांग्रेसका जिल्ला नेतृत्वको रोहवरमा भएको वार्ता सकारात्मक बनेको हो । अब चाँडै सवै राजनीतिक दल सम्मिलत सर्वदलिय बैठक बोलाएर सोहि बैठकले गर्ने निर्णय बमोजिम प्रकृयामा लगेर करको विषय शंसोधन गरिने रंगेली नगरपालिकाका मेयर दिलिप बगडीयाले जानकारी दिए ।
उनले रंगेलीका सवै राजनीतिक दलहरुलाई बोलाएर सर्वदलिय बैठक बसि उक्त बैठकले गर्ने निर्णय अनुसार कर संशोधनको विषयलाई प्रकयामा लैजाने बताए ।
नगरपालिकाले कर वृद्धि गरेको भन्दै नेपाली कांग्रेस, माओवादी केन्द्र, जसपा नेपाल, जनमत र राप्रपाले ज्ञापनपत्र बुझाएर आन्दोलनमा उत्रिएका थिए ।
रंगेलीको माओवादी केन्द्र, जसपा नेपाल, जनमत र राप्रपाले संयुक्त रुपमा आन्दोलन गरेका थिए । तर, नगरपालिकासँग भएको छलफल सकारात्मक भएपछि उनीहरुले आन्दोलन स्थगित गरेका थिए ।
नेपाली कांग्रेसले अलग्गै चरणवद्ध आन्दोलन गर्दै आएको थियो । नेकपा (एमाले) रंगेलीले पनि नगरपालिकालाई ज्ञापनपत्र बुझाएर कर सम्वन्धी राय सुझाब दिएको थियो ।
