विराटनगर, २३ असोज । नेकपा (एमाले) मोरङका अध्यक्ष ऋषिकेश पोखरेलले प्रतिनिधिसभा सदस्यका लागि उम्मेदवारी दर्ता गराएका छन् । रतुवामाईको सिजुवास्थित निर्वाचन अधिकृतको कार्यालयमा पुगेर एमालेको तर्फबाट प्रतिनिधिसभा सदस्यका लागि उम्मेदवारी दर्ता गराएका हुन् ।
नेता पोखरेलले आफू तीन वर्ष संविधानसभा सदस्य हुँदा आफ्नो क्षेत्रको समाज परिवर्तनका लागि सुरु गरेका कामहरु पुरा गर्न आफ्नो उम्मेदवारी भएको बताए । ‘मलाई यहाँबाट एकपटक संविधान निर्माण गर्ने अवसर दिनुभयो, पुरा गरेरै आएँ ।‘ उनले भने,‘अब संविधानसभा सदस्य भएका बेला सुरु गरेका काम पुरा गर्न र एकपटक हाम्रो समाज वदल्नका लागि सवैले आशिर्वाद दिनुहोस् भन्ने आग्रह गर्न चाहन्छु ।’
अध्यक्ष पोखरेलले मोरङ क्षेत्र नम्बर २ को चौतर्फी विकासका लागि योजना अघि सारेका छन् । उनले सो क्षेत्रको शिक्षा, स्वास्थ्य, कृषि, भौतिक पूर्वाधार निर्माणका योजनाहरुलाई प्रथामिकतामा राखेका छन् ।
अध्यक्ष पोखरेलले शिप तथा रोजगारमुलक शिक्षाको विकास, प्राविधिक शिक्षालयहरुको स्थापना, स्वास्थ्य सेवालाई सवैको पहुँचमा पुर्याउन स्वास्थ्य पूर्वाधार विस्तार, भौतीकपूर्वाधार निर्माण, कृषि क्षेत्रको प्रवद्र्धन र विकास, युवाहरुका निम्ति विषेश योजना बनाएका छन् ।
त्यस्तै पछाडी पारिएका समुदायको चौतर्फी विकास र जनताका आधारभूत आवश्यकता र सुकुम्बासीको बास र जिवन परिवर्तनको कार्ययोजनासमेत उनले बनाएका छन् । त्यस्तै खेलकुद र पर्यटनका क्षेत्रमा समेत विषेश योजना बनाएर कार्यान्वयन गराउने नेता पोखरेलको योजना छ ।
रतुवामाई–५ घर भएका पोखरेल सो क्षेत्रको सुखदुख बुझेका नेता हुन् । निरन्तर स्थानीय जनताबिच घुलमिल रहने र हरेक सुखदुखमा साथ दिँदै आएका नेता पोखरेल उक्त क्षेत्रका समस्याबारे जानकार छन् ।
उनले आफू संविधानसभा सदस्य हुँदासमेत सो क्षेत्रमा विकासका धेरै योजनाहरु अघि सारेका छन् । करिब ३ वर्ष संविधानसभा सदस्य भएकाबेला सो क्षेत्रमा थुप्रै योजनाहरुको थालनी गरेका थिए ।
सो क्षेत्रबाट लगातार तीस वर्ष बढी समय नेपाली कांग्रेसका उम्मेदवार निर्वाचित भएर काम गरेको तुलनामा पोखरेलले ३ वर्ष संविधानसभा सदस्यको जिम्मेवारीमा हुँदा मात्र पनि धेरै कामहरु गर्न सफल भएको स्थानीय जनताले अनुभूती गरेका छन् ।
नेता पोखरेलले संविधा निर्माण प्रकृयामा ३ वर्षमा समाज वदल्न सुरु गरिएका कार्यहरुलाई सम्पन्न गर्न यसपटक आफूलाई प्रतिनिधिसभा सदस्य र सोही क्षेत्रको प्रदेश (क) बाट डिबी कार्की र (ख) बाट लिलाबल्लभ अधिकारीलाई प्रदेशसभा सदस्यमा निर्वाचित गराउन आग्रह गरेका छन् ।
