विराटनगर, १७ असार । रोटरी क्लब अफ विराटनगर डाउन टाउनको अध्यक्षमा रेखा राठी चयन भएकी छिन् । उनी वर्ष २०२२–२३ का लागि अध्यक्षमा चयन भएकी हुन् ।
महिलाहरुलाई संगठित गरेर विभिन्न सामाजिक कार्यहरु निरन्तर गर्दै आएको रोटरी क्लब अफ विराटनगर डाउन टाउनको १८ औँ अध्यक्षका रुपमा राठी चयन भएकी हुन् ।
राठी लामो समयदेखि रोटर क्लब अफ विराटनगर डाउन टाउनमा रहेर शिक्षा, स्वास्थ्य, वातावरण र आपतकालिन सेवाको क्षेत्रमा काम गर्दै आएकी थिइन् । उनले क्लबको विभिन्न जिम्मेवारी कुशलतापूर्वक निर्वाह गरिसकेकी छिन् ।
क्लवका नयाँ पदाधिकारीहरुको पदस्थापन आगामी ४ जुलाईमा हुनेछ । विराटनरस्थित अतिथी सदनमा आयोजना गरिएको कार्यक्रममा पदस्थापन हुने जनाइएको छ ।
आफ्नो कार्यकालमा पनि क्लबको उद्देश्य अनुसार शिक्षा, स्वास्थ्य र वातावरणको क्षेत्रमा निरन्तर कार्य गर्ने राठीले बताइन् । उनी विराटनगरका उद्योगी अनुपम राठीकी धर्मपत्नी हुन् ।
त्यस्तै क्लबको सचिवमा नमिता टिवडेवाल चयन भएकी छिन् । आगामी कार्यकालको कोषाध्यक्षमा प्रियंका मुण्दडा चयन भएकी छिन् । उनी मोरङ व्यापार संघका निवर्तमान अध्यक्ष प्रकाश मुण्दडाकी धर्मपत्नी हुन् ।
यसपटक चयन भएका पदाधिकारीहरु अनुभवी र सकृय महिलाका कारण क्लबले उदाहरणीय काम गर्ने अपेक्षा गरिएको छ । क्लबले हिन्दु नारीहरुको महान पर्व हरितालिका तिजको अवसरमा महिला उद्यमीहरुले उत्पादन गरेका विभिन्न घरेलु सामाग्रीको प्रदर्शनी र मेला कार्यक्रमसमेत गर्ने योनाा बनाएको अध्यक्ष राठीले जानकारी दिइन् । सो मेला क्लबले प्रत्येक वर्ष आयोजना गर्दै आएको छ । तर, एक वर्ष भने कोरोना महामारीका कारण सो मेला लाग्न सकेको थिएन ।
